У Паставах з аншлагам прайшла народна-патрыятычная прафсаюзная акцыя “Мы — разам!”
— Арганізатары акцыі імкнуцца паказаць, што ў Беларусі жывуць унікальныя людзі, якія ўмеюць шчыра працаваць, весела адпачываць, радавацца перамогам іншых і выбіраюць моцную і квітнеючую Беларусь, — гаварыла вядучая Вольга Плотнікава. — На гэты раз мерапрыемства прысвячаецца парламенцкім выбарам, якія адбудуцца 17 лістапада. Мы імкнёмся данесці да кожнага наколькі важна выбраць у парламент прафесіяналаў, якія ведаюць праблемы грамадства і як іх вырашыць. Менавіта адл гэтых людзей будзе залежаць якасць прынятых законаў, згодна з якімі нам прыйдзецца жыць і працаваць. Будучыня краіны — у нашых руках.
— Прафсаюзы традыцыйна прымаюць актыўны ўдзел ва ўсіх этапах выбарчай кампаніі, — гаварыла старшыня Пастаўскага раённага аб’яднання прафсаюзаў Іна Далецкая. — Многія члены прафсаюза ўваходзяць у склад участковых выбарчых камісій, з’яўляюцца назіральнікамі. Сярод зарэгістраваных кандыдатаў у дэпутаты па Пастаўскай выбарчай акрузе №29 ёсць адзін прадстаўнік Федэрацыі прафсаюзаў. Акцыя — гэта таксама нагода сказаць чарговы раз “дзякуй” людзям працы — як ветэранам, так і маладым спецыялістам, рабочым, старшыням прафкамітэтаў.
Юбілейнага медаля “115 гадоў прафсаюзнаму руху Беларусі” ўдастоены дырэктар ААТ “Навасёлкі-Лучай” Юрый Шымчык. У гаспадарцы грунтоўна распрацаваны і дзейнічае калектыўны дагавор. Паміж прафсаюзным камітэтам і адміністрацыяй склаліся партнёрскія адносіны: прафкам прымае ўдзел у рэгуляванні працоўных адносін, ва ўзгадненні нарматыўных і лакальных дакументаў. Змены і дапаўненні ў калектыўны дагавор уносяцца толькі з узаемнай згоды бакоў. Дырэктар у сваю чаргу падтрымлівае аўтарытэт прафсаюза, пастаянна аказвае дапамогу.
Тое самае можна сказаць і пра кіраўніка ААТ “Камайскі-агра” Канстанціна Гайлеўскага, начальніка Варапаеўскай дыстанцыі пуці Аляксандра Кандыбіна. У гэтых калектывах паміж наймальнікам і прафкамам наладжана канструктыўнае сацыяльнае партнёрства. Прафсаюзны актыў праяўляе клопат пра людзей і сумесна з адміністрацыяй удзельнічае ў вырашэнні надзённых пытанняў. Заслужаным аўтарытэтам карыстаюцца прафсаюзныя лідары Вера Ушкур (дыстанцыя пуці), Таццяна Рудзік (СШ №4). Вышэйпералічаным лідарам Іна Далецкая ўручыла граматы і падзякі Федэрацыі прафсаюзаў Беларусі.
А як было не адзначыць старанне аператараў машыннага даення кароў ААТ “Навасёлкі-Лучай” Ганны Шалякінай, ААТ “Камайскі-агра” — Надзеі Шушкевіч, Ганна Ганаратаўна працуе на рабатызаванай ферме ў Коўзанах, Надзея Аляксандраўна — на мягунскай. Сярэдні надой ад каровы ў групах, якія яны даглядаюць, за 9 месяцаў бягучага года склаў 5 889 і 4 624 кілаграмы адпаведна.
Тэкст і фота Анны Анішкевіч, «Пастаўскі край»
