Сустрэчы ў прафсаюзных пярвічках Ушаччыны правеў старшыня абластного аб’яднання прафсаюзаў Іван Вазміцель
Прафсаюзны лідэр пабываў на некалькіх прадпрыемствах, дзе сустрэўся з кіраўнікамі, старшынямі “пярвічак”, пагутарыў з работнікамі. У ДРБУ-105, напрыклад, начальнік філіяла Аляксандр Пячкоўскі, хоць і нядаўна прызначаны на пасаду, але ўжо добра ведае аб стане спраў у прафсаюзнай арганізацыі, якую ўзначальвае інжынер па якасці Аляксандра Кацур. Яна коратка расказала аб дзейнасці “пярвічкі”, ініцыятывах яе актыву. І.К.Вазміцель зазначыў важнасць таго, што работа прафсаюзнай арганізацыі (у якую, дарэчы, уваходзяць усе без выключэння члены калектыву) не зводзіцца да ўдзелу ў спартыўных і культурна-масавых мерапрыемствах, якія праводзяцца ў раёне, а ўключае ў сябе абарону інтарэсаў працуючых.
Ва УП ЖКГ Ушацкага раёна Іван Вазміцель правёў гутарку са старшынёй прафсаюзнай арганізацыі Таццянай Міцкевіч, работнікамі інжынерна-тэхнічнай службы, расказаў аб дзейнасці прававых інспектараў, правядзенні імі прыёмаў грамадзян сумесна з работнікамі пракуратуры. Іван Канстанцінавіч нагадаў таксама аб ініцыятыве Федэрацыі прафсаюзаў Беларусі аб заключэнні кантрактаў з добрасумленнымі работнікамі на максімальны тэрмін, выкананні калектыўных дагавораў і некаторых іншых аспектах дзейнасці аб’яднання.
Пабываў старшыня ВААП разам са старшынёй раённага аб’яднання прафсаюзаў Марыяй Шаўчэнка і на прыватным прадпрыемстве “Твестуба-ПРО”. Тут зараз працуе каля 40 чалавек, а вось прафсаюзнай арганізацыі няма. І.К.Вазьміцель пацікавіўся меркаваннем намесніка дырэктара па вытворчасці Нэлі Канстанцінаўны Хвошч наконт стварэння “пярвічкі” і атрымаў станоўчы адказ: “Адміністрацыя не супраць, калі людзі захочуць – створым”. Іван Канстанцінавіч абяцаў накіраваць на прадпрыемства прадстаўніка галіновага прафсаюза. Улічваючы спецыфіку дзейнасці “Твестубы-ПРО”, хутчэй за ўсё гэта будзе спецыяліст абласнога прафсаюза работнікаў мясцовай прамысловасці і камунальна-бытавых прадпрыемстваў. З ім калектыў і будзе весці прадметную размову наконт стварэння пярвічнай прафсаюзнай арганізацыі.
Источник: belpatriot.by
