Новы выгляд знакавага месца ў Браславе
Работы, ініцыіраваныя прафсаюзамі і мясцовымі ўладамі, завяршыліся тут літаральна напярэдадні. У парку кардынальна змянілася атмасфера: пад нагамі з’явіўся прыгожы і нават утульны брук у стылі «стары горад», дызайнерская падсветка і лавачкі, выкананыя па матывах такіх жа ў зоне адпачынку «Брукоўка»: такі ход, па задумцы, павінен аб’яднаць асобныя раней тэрыторыі ў адзіны комплекс.
Што тычыцца воінскага пахавання, то і яно само, і яго наваколле таксама прыведзены ў адпаведнасць патрабаванням часу. Уваход у мемарыял цяпер абрамляе арка, а ўнутры стаяць стыльныя лаўкі і такія ж свяцільні. Акрамя таго, устаноўлены тры новыя пліты з выбітымі на іх 54 прозвішчамі загінулых пры вызваленні Браслаўшчыны салдат — гэта вынік карпатлівай работы па ўвекавечванні, якая цяпер актыўна ідзе ў раёне.
Дарэчы, на добраўпарадкаванне месца затрачана больш за 40 тысяч рублёў (сродкі суботніка, спонсарская дапамога Федэрацыі прафсаюзаў Беларусі і бюджэтныя грошы). Работы, не шкадуючы часу і сіл, выконваў «Браслаў-камунальнік», для якога завяршэнне бягучага рамонту ў абяцаны тэрмін стала сапраўднай справай гонару.
Адкрываючы комплекс, старшыня райвыканкама Аляксандр Баданін падзякаваў усім, хто меў дачыненне да яго абнаўлення, і зазначыў, што гэта зроблена не толькі напярэдадні свята Вялікай Перамогі, але і ў юбілейны год вызвалення Беларусі ад нямецка-фашысцкіх захопнікаў, што вельмі сімвалічна.
Традыцыйную ў такіх выпадках чырвоную стужку разам з кіраўніком раёна перарэзалі старшыні райсавета Ніна Пучынская і раённага аб’яднання прафсаюзаў Павел Сільчонак. Яны ж і першымі ўсклалі да помніка вянок і кветкі.
Вячаслаў Каладынскі, «Браслаўская звязда»
Фота аўтара.
