15 лютага прайшло чарговае пасяджэнне Савета Шаркаўшчынскага раённага аб’яднання прафсаюзаў

15 лютага ў вялікай зале райвыканкама прайшло чарговае пасяджэнне Савета Шаркаўшчынскага раённага аб’яднання прафсаюзаў пад кіраўніцтвам яго старшыні Ігара Малюгіна.

Удзел у рабоце Савета прынялі старшыня Віцебскага абласнога аб’яднання прафсаюзаў Юрый Дзеркач, старшыня Шаркаўшчынскага райвыканкама Дзмітрый Ламака, дэпутат Віцебскага абласнога Савета дэпутатаў Іван Вазміцель.

На пасяджэнне былі запрошаны старшыні галіновых прафсаюзаў раёна, старшыні пярвічных прафсаюзных арганізацый, прадстаўнікі грамадскіх аб’яднанняў. З асноўным дакладам выступіў старшыня раённага аб’яднання прафсаюзаў Ігар Малюгін.
Ён агучыў інфармацыю аб дзейнасці аб’яднання за мінулы год, зачытаў план работы на 2022 год. Савет раённага аб’яднання прафсаюзаў адзначыў, што раённымі арганізацыямі галіновых прафсаюзаў і пярвічнымі прафсаюзнымі арганізацыямі праводзіцца значная работа па выкананні рашэнняў VІІІ З’езда Федэрацыі прафсаюзаў Беларусі, Праграмы дзейнасці ФПБ на 2020-2025 гады.
Таксама Ігар Віктаравіч зачытаў прысутным тэкст дэкларацыі аб падтрымцы рэферэндума па ўнясенні змяненняў і дапаўненняў Канстытуцыі Рэспублікі Беларусь, якая была прынята ўдзельнікамі V пленума Савета ФПБ.

Затым да прысутных звярнуўся старшыня Віцебскага абласнога аб’яднання прафсаюзаў Юрый Дзеркач. У прыватнасці, ён сказаў пра тое, якія задачы на будучае ставіць перад сабой Федэрацыя прафсаюзаў Беларусі. Гэта, у першую чаргу, падрыхтоўка і ўдзел у рэспубліканскім рэферэндуме па змяненні і дапаўненні Канстытуцыі Рэспублікі Беларусь, які адбудзецца ў краіне 27 лютага. На яго думку, кожны сумленны чалавек, якому не абыякавы далейшы лёс нашай краіны, павінен выканаць свой грамадзянскі абавязак і прыйсці на ўчастак для галасавання.
Яго падтрымалі ў сваіх выступленнях старшыня Шаркаўшчынскага райвыканкама Дзмітрый Ламака, дэпутат Віцебскага абласнога Савета дэпутатаў Іван Вазміцель, старшыні прафсаюзных арганізацый, прадстаўнікі грамадскіх аб’яднанняў.
Па выніках праведзенага Савета Шаркаўшчынскага раённага аб’яднання прафсаюзаў аднагалосна былі прыняты адпаведныя Пастановы.
У красавіку 2019 года паміж Шаркаўшчынскім раённым выканаўчым камітэтам, раённым аб’яднаннем прафсаюзаў і раённым саюзам наймальнікаў было падпісана трохбаковае пагадненне на 2019—2021 гады.
Падчас пасяджэння Савета раённага аб’яднання прафсаюзаў Дзмітрый Ламака, Ігар Малюгін і Эдвард Вялічка падпісалі пагадненне аб працягу супрацоўніцтва на наступныя тры гады. Як сказаў Ігар Малюгін, пагадненне — гэта аснова для заключэння калектыўных дагавораў у арганізацыях. Яго нормы з’яўляюцца абавязковымі на тэрыторыі раёна і не могуць быць зменены ў бок зніжэння сацыяльнай і эканамічнай абароненасці работнікаў.

Сяргей РАЙЧОНАК.